पुस ९
पर्यटकीय नगरी पोखरामा दोस्रो नेपाल–चाइना फ्रेन्डसीप ड्रागन बोट महोत्सव पुस १४ र १५ गते आयोजना हुने भएको छ।
नेपालस्थित चिनियाँ दूतावास, नेपाल पर्यटन बोर्ड र गण्डकी प्रदेश सरकारको संयुक्त आयोजनामा दोश्रो नेपाल–चाइना फ्रेन्डसीप ड्रागन बोट महोत्सव आयोजना गर्न लागिएको काठमाडौंमा आयोजित पत्रकार सम्मेलनमा जानकारी दिइएको हो। ड्रागन बोट महोत्सवमा नेपालका ११, चीनका ८ र सिंगापुरका एक गरि २० वटा समूहको सहभागिता रहने आयोजकले जनाएको छ।
२ सय मिटर र ५ सय मिटर दूरीमा आयोजना गरिने प्रतियोगितामा दुई दूरीका प्रथम हुने विजेता समूहले ५ हजार डलर, उपविजेताले २ हजार डलर र तृतीयले १ हजार २ सय डलर पुरस्कार प्रदान गर्ने बताइएको छ।
सहभागी १७ वटा समूहलाई प्रतिसमूह पाँच सय डलर प्रदान गरिने आयोजकले जनाएको छ। प्रतियोगिताले नेपाल र चीनका नागरिकबीच सुमधुर सम्बन्ध स्थापित हुनुका साथै नेपालको पर्यटन प्रवर्द्धन हुने अपेक्षा गरिएको नेपाल पर्यटन बोर्डका कार्यकारी अधिकृत दीपकराज जोशीले बताए।
सन् २०१९ मा चीनबाट एक लाख ६९ हजार ५३४ र २०२३ मा ६० हजार ८७४ पर्यटकले नेपाल भ्रमण गरेको बोर्डले जनाएको छ। २०२४ को जनवरीदेखि नोभेम्बरसम्म ९२ हजार ८४८ चिनियाँ पर्यटकले नेपाल भ्रमण गरेको तथ्यांक रहेको छ।
