भैरहवा साउन २३
३१ औं विश्व आदिवासी जनजाती दिवसको पूर्व सन्ध्यामा रुपन्देहीको ४ ठाउमा वृक्षारोपण गरिएको छ । बौद्ध समाज नेपालको आयोजनामा शुक्रबार बिभिन्न गुम्बा तथा विहारहरुमा फलफुलका विरुवा रोपिएको छ ।
कार्यक्रम संयोजक जुना सारुका अनुसार शान्ती बौद्ध गुम्बा, बुटवलको रामनगर गुम्बा, देवदह बुद्ध विहार देवदह र नेपाल मगर संघ बेलवासमा गरि आप, अम्बा, कागती, कटहर, सरिफा लगायत विभिन्न प्रजातीका १३० वटा विरुवा रोपिएको छ ।
३१ औं विश्व आदिवासी जनजाती दिवस शनिबार बिभिन्न कार्यक्रम गरि मनाईदै छ । सोही अवसरमा गुम्बा तथा विहारहरुमा सम्झना स्वरुप फलफुलका विरुवा रोपी दिवसको सुरुवात गरिएको बौद्ध समाज नेपालका अध्यक्ष शंकर गाहाले जानकारी दिए। उनले विरुपा रोप्नु अगाडी बौद्ध लामा गुरुहरुले पूजापाठ गरेको बताए ।
बौद्ध समाज नेपालका अध्यक्ष शंकर गाहाको अध्यक्षता, आदिवासी जनजाती युवा महासंघकी केन्द्रिय सदस्य सुम्निमा राईको प्रमुख आतिथ्यतामा सम्पन्न भएको कार्यक्रममा नेपाल मगर युवा महासंघका केन्द्रिय महासचिव राम अस्लामी, बौद्ध समाज नेपालकी महासचिव राधिका पुन लगायत शान्ती बुद्ध विहारका पदाधिकारीहरुको सहभागीता रहेको थियो । कार्यक्रमको सञ्चालन बौद्ध समाज नेपालका सचिव तथा शान्ती बौद्ध गुम्बाका अध्यक्ष आस बहादुर गुरुङ्गले गरेका थिए ।